“Эл-Ди-Эс Черитиз” коомдук кайрымдуулук фонду Эмгек, социалдык камсыздоо жана миграция министрлигине караштуу №2 Токмок психоневрологиялык социалдык стационардык мекемесинде комплекстүү долбоорду ишке ашырды. Демилге андагы жашоочулардын  шарттарын жакшыртууга жана кам көрүүнүн сапатын жогорулатууга багытталган. Жыйынтыгында, интернат үтүктөөчү жабдууларды, абаны тазалоочу каражаттарды жана 20 электр жылыткыч алды.

Жүргүзүлгөн иштер интернаттын шартын санитардык-эпидемиологиялык талаптарга ылайыкташтырды. Ошол эле учурда жалпы ыңгайлуулуктун деңгээли жогорулады. Турак жай корпустарындагы температуралык режимдин турукташуусу негизги натыйжа болуп берди.

Жаңылоонун кийинки этабы ысык суу менен камсыздоону модернизациялоо болду. «Эл-Ди-Эс Черитиз» өнөктөштөрү менен биргеликте күн суу жылыткычтарын орнотту. Бул өлкөнүн социалдык камсыздоо тармагы үчүн альтернативдүү энергия булактарын киргизүүнүн биринчи практикалык тажрыйбасы болуп калды.

Орнотулган жабдыктар интернаттын турак жай корпустарын, мончосун жана ашканасын ысык суу менен камсыздайт. Анын курамына көлөмү 750 жана 1 000 литр болгон алты резервуар кирет, бул мекеменин муктаждыктарын толугу менен жабат жана суунун туруктуу берилишин камсыз кылат.

Мурда ысык суу ар биринин көлөмү 80 литрден болгон үч суу жылыткыч аркылуу берилчү. Алар эскирип калгандыктан кубаттуулугу жетишсиз болчу. Заманбап технологияларга өтүү ысык суунун жетишсиздигин жоюуга жана камкордукка алынгандардын күнүмдүк жашоо шартын бир топ жакшыртууга мүмкүндүк берди.

Токмок интернаты мүмкүнчүлүгү чектелген адамдардын туруктуу жашоосуна ылайыкталган жалпы типтеги медициналык-социалдык стационар болуп саналат. Бул жерде 250 адам жашайт, аларга күнү-түнү кам көрүлөт, ошондой эле тиричилик жана медициналык тейлөө көрсөтүлөт. Мекеме 1930-жылдан бери иштеп келет.

“Эл-Ди-Эс Черитиз” өз ишмердүүлүгүндө социалдык жактан аялуу катмардын чыныгы муктаждыктарына жана узак мөөнөттүү натыйжага багытталган колдоо моделин ишке ашырат.