Кыргызстанда медициналык адистердин квалификациясын жогорулатууга жана жаңы төрөлгөн ымыркайларга тез жардам көрсөтүү көндүмдөрүн өркүндөтүүгө багытталган “Жаңы төрөлгөн ымыркайларды алгачкы реанимациялоо” боюнча машыктыруучулар үчүн атайын беш күндүк тренинг башталды.

Өлкө үчүн бул масштабдуу жана маанилүү иш-чара “Эл-Ди-Эс Черитиз” фондунун колдоосу менен өтүүдө. Аталган фонд 2009-жылдан бери саламаттыкты сактоо системасын өнүктүрүүгө жардам берип, медициналык адистерди окутууну колдоп, энелердин жана ымыркайлардын өлүмүн азайтуунун заманбап ыкмаларын киргизүүдө. Анын бири – жаңы төрөлгөн ымыркайлардын өмүрүн алгачкы мүнөттөрдө сактап калууга түздөн-түз катышкан акушерлерди жана неонатологдорду даярдоо.

Окутуу 2026-жылдын 12-майынан 16-майына чейин Бишкек шаарындагы Кыргыз Республикасынын Эне жана баланы коргоо улуттук борборунун базасында өткөрүлөт. Ошондой эле 18-майдан 22-майга чейин Манас шаарында улантылат. Окутууну Россиянын Саламаттыкты сактоо министрлигинин “В.И.Кулаков атындагы Улуттук акушердик, гинекология жана перинатология илимий изилдөө борбору” федералдык мамлекеттик бюджеттик мекемесинин адистери жүргүзөт.

Программа симуляциялык технологияларды колдонуу жана практикалык көндүмдөрдү иштеп чыгуу менен тренерлер үчүн тренинг форматында уюштурулган. Катышуучулар жаңы төрөлгөн ымыркайларды алгачкы реанимациялоонун заманбап алгоритмдерин, анын ичинде баланын абалына алгачкы баа берүүнү, дем алууну камсыз кылууну, баштык жана маска менен желдетүүнү, ошондой эле көкүрөк клеткасын кысууну жана төрөт залынын шарттарында командалык ишти үйрөнүшөт.

Неонатолог-врачтын жана акушер-гинекологдордун ролуна өзгөчө көңүл бурулат, анткени алар жаңы төрөлгөн ымыркайлардын критикалык абалына биринчи туш болушат жана алардын иш-аракеттеринин ырааттуулугунан баланын төрөлгөндөн кийинки алгачкы мүнөттөрдө өмүрүн сактап калуу көз каранды. Ошондой эле медициналык кызматкерлерди практика жүзүндө окутуу ыкмалары, симуляциялык сценарийлер жана клиникалык учурларды талдоо каралат.

Курс тестирлөө, практикалык аттестация жана сертификаттарды тапшыруу менен жыйынтыкталат. Уюштуруучулар программа адистерди даярдоонун туруктуу системасын түзүүгө жана өлкөнүн аймактарында неонаталдык жардамдын сапатын жогорулатууга багытталганын белгилешет.

Бул курс энени жана баланы коргоо системасы үчүн маанилүү. Анын максаты – адистердин билимин жана практикалык көндүмдөрүн бекемдөө гана эмес, ошондой эле өз уюмдарында жана аймактарында андан ары каскаддык окутууларды өткөрө ала турган тренерлерди даярдоо.